Արարատ Միրզոյանը՝ Տավուշի գյուղերի մասին

Հայաստանի իշխանությունները Տավուշի մարզի հայկական գյուղերի հանձնման շուրջ բանակցություններ չեն վարում: Այս մասին մարտի 15-ին Ազգային ժողովում հայտարարեց Հայաստանի արտաքին գործերի նախարար Արարատ Միրզոյանը՝ ԱԺ արտաքին հարաբերությունների մշտական ​​հանձնաժողովի նիստում՝ կառավարության ծրագրի (2021-2026թթ.) կատարման ընթացքի և 2023 թ.-ի արդյունքների հաշվետվության քննարկման ժամանակ։  Այս մասին հաղորդում է News.am–ը։

Նրա խոսքով` Հայաստանում ոչ մի պաշտոնյա իրավունք չունի բանակցել Տավուշի մարզում և Հայաստանի այլ մարզերում գտնվող գյուղերի, տարածքների, հողամասերի հանձնման շուրջ։

«Սա աքսիոմատիկ ճշմարտություն է։ Կան երաշխիքներ, որոնց շրջանակներում գործում են իրավական մեխանիզմները։ Հետեւաբար, մենք Տավուշի գյուղերի հանձնման շուրջ բանակցություններ չենք վարում»,- ասաց Հայաստանի ԱԳՆ ղեկավարը։

Հիշեցնենք, որ վարչապետ Փաշինյանը մամուլի ասուլիսում նման փաստարկներ արեց՝ պնդելով, որ հայկական գյուղերը չեն հանձնվում, իսկ Հայաստանում ադրբեջանական անվանումներով գյուղեր չկան։ Ադրբեջանը հավակնում է 4 գյուղի, որոնք այժմ գտնվում են Տավուշի մարզում, մի քանիսը գտնվում են Հայաստան-Վրաստան մայրուղու վրա։ Նշենք նաեւ, որ Ադրբեջանում Հայաստանի բոլոր բնակավայրերը կոչվում են աղավաղված ադրբեջանական տեղանուններով, այդ թվում՝ Երեւանը։