Երբ պետք լինի՝ հանելու ենք ռուսական ռազմաբազան․ Խաչատրյան
Հայաստանը երբևէ այսքան բարձր սուբեկտայնություն չի ունեցել, որքան հիմա։
Այս մասին Ազգային ժողովում լրագրողների հետ ճեպազրույցի ժամանակ ասաց «Քաղաքացիական պայմանագիր» խմբակցության պատգամավոր, պաշտպանության և անվտանգության հարցերի մշտական հանձնաժողովի փոխնախագահ Արմեն Խաչատրյանը։ Այս մասին հաղորդում է ՀԺ–ն։
«Հայաստանի հետ հաշվի են նստում թե՛ Արևմուտքը, թե՛ ԱՄՆ-ն, և շատ այլ ռազմավարական հարցեր են քննարկվում։ Այն ժամանակներում, այո՛, Մարի Զախարովայի երկրում էր որոշվում շատ հարցեր, թե Հայաստանը որտեղ պետք է գնա և այլն։ Անվտանգության հետ կապված էլ պետք է ասեմ, որ Հայաստանը բազմաշերտ է սարքում իր անվտանգային համակարգն ու ամեն ինչ անելու է, որպեսզի դա բավարարի այսօրվա պահանջներին, դա հիմա ում է դուր գալիս կամ ում դուր չի գալիս, էական չէ»,- նկատեց նա:
Ըստ պատգամավորի՝ Հայաստանը տեսել է այն անվտանգային համակարգը, որը եղել է. «Ընդամենը թղթի վրա գրված պայմաններ են եղել, որոնք ի կատար չեն ածվել։ Դրա չգործելու հետևանքով այսօր Ադրբեջանը 150 կմ քառակուսի տարածք է օկուպացրել և այլն: Մենք այլևս անհիմն վստահելու կամ հավատալու իրավունք չունենք և գործնական քայլերի ենք դիմել բոլոր ուղղություններով»։
Անդրադառնալով այն հարցին, թե ռուս սահմանապահները անվտանգության հարցում լուրջ դերակատարություն ունեն՝ Խաչատրյանը նկատեց․ «Այո՛, ունեն, բայց պետք է ասենք հետևյալը՝ ռազմաբազան գոյություն ունի, ամեն դեպքում Հայաստանի նոր անվտանգային համակարգի գծագրությունից պարզ կդառնա, թե մեր հետագան ինչպես է լինելու։ Պետք է ասեմ, որ այդ ռազմաբազան ոչնչով չօգնեց, երբ գրավեցին ՀՀ սուվերեն տարածքները: Այս պահին ֆիզիկապես կանգնած են սահմանին, բայց որևէ դրական դերակատարում չունեցան, երբ ՀՀ-ին կոնկրետ սպառնալիքներ կային ու այսօր էլ կա»:
Ըստ նրա՝ երբ պետք լինի, ռուսական ռազմաբան հանելու են Հայաստանից: